الغريب أن الكثير منا يعتقد انه الزنجبار في عمان والا في اليمن .. و لكن هي جزيرة في القارة الأفريقية تابعة ل تانزانيا
المهم .. الزنجبار جزيرة جميلة وااااايد ، أهلها طيبيييين حيييييل .. و بعضهم يتكلم اللغة العربية الفصحى بعد . و أول ما عرفو انا أحنا عرب فرحو وااايد و رحبوا فينا :)
93% من أهلها مسلمين و 6% مسيحيين و الباقي هندوس .. يعيشون كلهم بأمان من غير أي فتنة دينية أو خلاف عقائدي . المصدر الرئيسي للرزق هو البحر ,, الصيد ، صناعة السفن ، التجارة عبر البحر . غير هذا فالزنجبار تعتبر جزيرة زراعية غنية ينزرع فيها أغلب أنواع الفواكة و الخضراوات ... و فيه فاكهة أول مرة بحياتي أشوفها وأذوقها يقولون انها بس بالزنجبار و مو موجودة بأي مكان ثاني بالعالم ..تخيلو فاكهة طعمها مكس بين الأناناس و الموز !!!! لذييييييييييييييييييييييييييييييييييييييييييييييييييييييييييذه
و بجانب الفاكهة .. فالزنجبار مشهورة بأفخر أنواع البهارات لدرجة انها تصدر للعالم و مكتفيا ذاتيا .
تعرضت الزنجبار للاستعمار من قبل الدول الأوروبية و لكن بعد هذا استولو عليها العرب من عمان و حكموها لمئات السنين حتى استغلالهم .. و انعكس هذا على عاداتهم و تقاليدهم و أكلهم و لغتهم بعد ... فالشعب الزنجباري ليس جميعه أفريقي ، فيه زنجباريين عمانيين أشابيههم خليجية 100% و زنجباريين أصولهم هندية .
اللبس التقليدي يشبه الزي العماني الشعبي كثيرا .. الدشداشة و الطاقية و مرات العمامة و البشت في المناسبات الخاصة و الأفراح . أما النساء فأغلبهم يغطون رؤوسهم و مكحلين :) .. من المأكولات الشعبية عندهم (اللقيمات) و يسمونها (قيمات) باللغة السواحيلية ، و (الحلوة)مثل مالت البحرين و عمان . المدينة لما تتمشون فيها جنها الكويت أيام ما قبل النفط ، يهال يلعبون بالشوارع و الشياب طايحينلا شيشا و داما !
استعبد الشعب الزنجباري الأفريقي على يد الأوروبيين المسيحيين وبعد ذلك السلاطنة العمانيين و كانوا يتعرضون للتعذيب و الجلد في الكنائس و يقتلون في المذابح الجماعية .. و لكن انتهت العبودية بفضل تاجر عربي مسلم و قسيس مسيحي عملوا معا و قضوا على العبودية .
و بعد كل هالهذره (الي أتمنى انها كانت مفيدة) .. أخليكم مع الصور ;)
المدينة (stone town)
بوابات بزخرفة اسلامية
الزي الزنجباري - جنه عماني
منو يوصل قبل !
هاذي أم الأزرق شنو شيطانة ... قلبت روسنا ، الا تعالو صوروني :)
جحر لتعذيب العبيد - السلاسل كانت تنربط بعنق العبيد
تماثيل تذكارية لأيام العبودية في الزنجبار - كانوا العبيد ينحطون بهالحفر و ينربطون بالسلاسل و يجلدون و يعذبون
مسجد و كنيسة :)
ايوا يا لرقاصه ! :)
حشرات غريبة عجيبة
أناناس
(عرس زنجباري)العروس و المعرس
الرجال في العرس
النساء في العرس
حق الي يحبون البحر
دلافين
راحة و استجمام و هوا البحر يكفخكم .. أحلى نومه
هناك 9 تعليقات:
اول شي سلامة الاسفار
ثانيا
تبي الصج شوقتني حيل حيل
بس ما ذكرت لنا
التفاصيل
مثل الجو استوائي على مدار السنة و الا شنو
و طريقة الوصول لهالجزيرة
على اي طيران
و العملة
ترى فعلا شوقتنا على هالتقرير
و مشكور
يعطيك العافيه بو عابد ..
هالسوالف ما قلتلي عنها بالقهوه ذاك اليوم :)
بصراحه الصور احلى من اللي قلتلي عنه ..
الرحله اليايه الى زنجباااار مع بوعابد و هم ناخذ معانا حاكي عقالي :)
enter-q8 :
الله يسلمك ..
(الجو) يا طويل العمر استوائي بشكل عام، لكن بشهر 7 و 8 يبرد عندهم الجو و يعتبرون هالشهرين أفضل وقت للسياحة .. الصبح شمس و لكن ما تحس فيها جنها مو موجودة و هوا بارد لطيف يعني جو مثالي للسباحة و البحر و بالليل هوا حلو بارد و مرات يصير براد و يحتاج جاكيت شتوي خفيف. و بحكم انها استوائية .. فيطق عليها مطر بشكل مفاجئ بس قليل جدا في شهر 7 و 8 مقارنة فباقي السنة و المطر عادة يطق بو خمس دقائق و بعدين تطلع الشمس جنه ما صار شي :)
(خط السفر) : رحلتي للزنجبار كانت متعبة شوي .. لأنه الأهل كانوا مصرين يروحون عن طريق الخطوط الاماراتية لأنهم بغوا يردون دبي و يتسوقون قبل لا نرد الكويت (كعادتنا أحنا الكويتيين) .. فكانت الرحلة من الكويت لي دبي و بعدين من دبي لي نيروبي بكينيا و بعدها طيارةداخلية من كينيا الى الزنجبار.المشكلة انه ما في رحلة ديركت من الكويت الى الزنجبار ، لكن فيه طريق أسهل من الكويت لي عمان و بعدين من عمان بالطيران العماني ديركت لي الزنجبار.
(العملة) عملتهم اسمها (الشيلينق) و الدينار الكويتي بحوالي 1200 شيلينغ ، الأسعار رخيصة بالنسبة للمدينة و أسواقها المتواضعة .. لكن الرحلات غالية شوي لأنها عادة ما تكون عن طريق الفندق و بتعامل مع شركه سياحية زنجبارية.
واذا فيه أي شي ثاني حاب تستفسر عنه أنا حاضر ..
dr-academy :
اذا الرحلة الياية مدفوعة التكاليف .. أنا أول واحد بالطيارة :)
صباح الخير
يعطيك العافية على هالصور الحلوة والحمدلله عالسلامة
كان عندي بس تعليقين على الكلام اللي إنكتب:
بخصوص الفتنة الطائفية: المسلمين أغلبية ساحقة ، فماكو مجال للمنافسة ، وأي بلد تلقى فيه أقلية مو مسلمة تلقاها ساكتة و بالعة العافية و تلقاهم يقولن إنهم مرتاحين وماكو فتنة و من هالكلام الودود ، لأنهم إذا قالوا غير هالكلام بيروحون فيها ، و أي ديرة يكون فيها المسلمين أقلية يكون العكس موجود ، يتشكون و يحسون بالنقص و الظلم ، لأن دائماً المسلمين يحبون إنهم يكونون المسيطرين ، لأنهم أتباع (خير) البشر ، و لأنهم (خير) أمة أخرجت للناس
ملحوظة: حالياً أكو حملات تبشيرية قوية
يعني يالعبد ترى الفتنة قادمة ، المسلمين و المسيحيين ما عنده شغل إلا الدعوة أو التبشير !
أما بخصوص تماثيل العبودية: هذي الأنصبة التّكارية حطوها بوقت متأخر جداً عشان يذكرون الناس بالإستعباد اللي كان يمارسه سلطان مسقط عليهم ، مو المستعمرين الأجانب ، و هالتماثيل مدفوعة الثمن من الدول الغربية ، و هذا موثق و إنذكر ببرامج وثائقية
و مشكور
شوقتني الصراحة
بس المشكله اجازتي دايما بشهر 10 و الا 11
بس هم يبيله
و مشكور على التفاصيل و ما قصرت
الحمدلله عالسلامه
الصور رووووووووووعه
شوقتنا نروح :)
زنجبار كانت جزء من السلطنة العمانية الى وقت قريب ثم تم التخلي عنها بواسطة السلطان سعيد بن تيمور
كانت مصنعاً للعبيد و شاهد على تجارة الرق و العبودية
Prof.academy
أشكرك على تعليقك .. و حلو نستفيد من البروفسور الأكاديمي :)
enter-q8
حاضرين .. و ما سويت الا الواجب :)
wa6an il nhar
لا تنسى تاخذني معاك !
حلم جميل بوطن أفضل:
كلامك صحيح .. و أشكرك على الاضافة:)
زنجبار من أحلى السفرات بحياتي
مع انها بسيطة حيل ، بس بساطتها معطيتها جو خاص
تقريبا كانت السفرة قبل خمس سنين , اذكر رحنا جزيرة صغيرة قريبة تبع زنجبار ، فيها مكان برايفت للسباحة للجروبات
بحرررهم , الأغاني ، المكان فيه عبق الماضي و ماتحسه مكان غريب عليك
ذكرتني بأيااااام حلوة .. : ) Thank u
إيفا
إرسال تعليق