هذا التجمع أو هذه الحملة هدفها توحيد القوى الطلابية الوطنية ..
الفكرة بحد ذاتها جميلة بل انها حلم اتمنى ان اراه يتحقق على ارض الواقع .. ولكن ...
هل القائمين على هذه الحملة وضعوا اسسا للقيام بمثل هذه الخطوة الكبيرة، ام ان ما يحدث هو رد فعل على نتيجة القوى المدنية في انتخابات مجلس الامة ؟
هل سنرى القوى الطلابية تتنازل عن بعض الامور و تضحي بتاريخها " اللي ما يوكل الخبز حاليا " من اجل ان تتوحد القوى الوطنيه ؟
هل سيكون هناك دور للقوى السياسية المدنية بالدفع بمثل هذة الفكرة الى النجاح ؟
هل وضع القائمون على التجمع مبادئ اساسية تجمع القوائم جميعا بحيث لا تتعارض مع طرحها قبل ان تتحد ؟
انا لا اريد الانتقاد ولست اكتب لأحبط همم هؤلاء الشباب .. ولكنني رأيت مثل هذا التحرك قبل اعوام وقد باء بالفشل .. لاسباب تافهه بالنسبة لمن هو جاد بتوحيد الصف الوطني ..
فمن اجل الهدف السامي نضحي بالامور التافهه كالاسم و التاريخ " الذي يذكرني بحال العرب و المسلمين عندما يتغنون بتاريخهم في الاندلس " ..
اتمنى ان لا يكون الهدف من التجمع هو الاطاحة بالائتلافية فقط ..
فالهدف الاسمى هو الوحدة و نشر الفكر السليم ..
هي رساله من مدونتي لهؤلاء الشباب الطموحين ..
اثبتوا على المبدأ و ليكن هدفكم توحيد الصف دون الطعن بالآخرين ..
ضعوا اولوياتكم و آلية عملكم فالتنظيم هو الاهم في هذه الفترة ..
ركزوا على هدف واحد ليتحقق ثم حققوا الذي يليه ..
تذكروا ان هدفكم سامٍ .. ولكم مني اصدق الامنيات بالتوفيق فيما انتم سائرون به ..
هناك 11 تعليقًا:
في البداية احب اشكرك اخوي "دكتور اكاديمي" على تخصيصك مساحة للحملة و مشاركتك معانا
اخوي الحملة يمكن الحين بديت شخصيا اتحرك فيها لانها حلم الغالبية و اسمعها من سنين بس ما شفت احد يتحرك فيها بشكل فعلي و جدي
و طبعا ما انسى انه اللي خلاني اتحرك فيها فعليا هالمرة كلمة
قالها رئيس لجنة الظواهر الدخيلة في ندوة التعريف باللجنة التي اقامها الاتحاد الوطني لطلبة الكويت فرع الولايات المتحدة
" يا اخوان لا تخافون يمكن اهمه كثرة في هالصالة ولكن نحن أكثر منهم برا"
يعني ما اتوقع اي شخص عنده ذرة وطنية في داخلة يرضى بهالإهانة ما اتوقع انه في شخص وطني يرضى يسمع الاخرين يتغنون و يتفاخرون انه التيار الوطني اللي حامل الدستور الكويتي على كتفة و قاعد يهاجم من جميع الجهات لانه يطالب بالحق ، اصبح قلة !!
اقسم بالله العظيم احنا مو قلة و هذا قسم يشهد عليه رب العالمين انه احنا مو قلة بس احنا متفرقين لازم انتوحد
بالنسبة للآلية و المبادئ و الاهداف احب اكون صريح معاك مو موجودة حاليا ما حبيت اتخذ خطوات فردية
انا طرحت الفكره عن طريق الفيسبوك كبداية احب اقيس نبض الشباب اذا لقيت تفاعل و تجاوب مع الفكرة راح نشكل فريق عمل يدرس اهم الاختلافات بين القوائم الوطنية و نحاول نحط لها حلول ترضي جميع الاطراف
و الخطوة اللي وراها راح ترتكز على مقابلة منسقين القوائم الطلابية الوطنية و نعرض عليهم الفكرة و نبين لهم الهدف من الحملة بشكل كامل
و بعدها راح نسوي ميثاق عمل يجمع القوائم الموقعه فيه على مبادئ أساسية و نرسم من خلال الميثاق آلية العمل
و أحب اطمنك انه الحملة ما تستهدف اسقاط الإتلافية و لا المستقبل الطلابي "التطبيقي" الهدف منها أسمى
توحيد القوى الوطنية الطلابية من وجهة نظري المتواضعة أهو الخطوة الأولى نحو توحيد القوى الوطنية السياسية خارج أسوار الجامعات
و بالنسبة للثبات عالموقف أطمنك أني بإذن الله ماراح اوقف عن هالحملة و هالدعوة حتى لو أظل واقف فيها بروحي
ولا اعتقد إنه أي احد من الشباب اللي انضم للجروب و أيد هالحملة له مصالح شخصية الكل حاط الديرة بعينه يبيها تزدهر يبي كلمة الحق ترد تعلى و تنور طريق مهده لنا عبدالله السالم رحمه الله و أحمد الخطيب و عبدالله النيباري و غيرهم من رموز التيار الوطني
أحب آطمن كل شخص يظن إنه لي مصلحة شخصية من هالشي اقول له كلمتين : أطمنك انا طالب خريج يعني ماراح اسعى حق منصب ولا غيره و بنفس الوقت انا طالب غير كويتي و افتخر اني كويتي الفكر و كويتي الضمير واني انولدت على هالارض و كليت من خيرها و افتخر انه ابوي استشهد حق هالارض مو حق غيرها ،، و اللي مازالت عنده شكوك ادعوه انه ينظم لنا و اذا ما عجبه الشغل او الآلية يقدر يبدي راية او ينسحب لكن مثل ما قلت انا شخصيا ماراح انسحب من هالشي لو على قص رقبتي ماراح اوقف االا لما اشوف القوى الوطنية ايد وحده
الله يعطيق العافية و موفقين انشاء الله بس حطولكم هدف و لا تشتتون جهودكم ..
تحياتي لك ..
يا أخ احمد الصقر
شلون تسوون تجمع و انت ما عندك حتى اساسياته ؟؟ اكو بيت ينبني بدون اعمدة ؟؟ اسمح لي بس شالتجمع الخرطي ؟ الحين تجمع القوى الطلابية و مع اساسياتهم و ما نجح ، هالمرة تبي تيمع البنات والشباب حق شي ماله اساس ؟ ماكو تخطيط و لا بطيخ !!
اخوي احمد الحمدلله ان ليلحين في بالكويت ناس فيهم خير حق ديرتهم مثلك و لو انك غير كويتي و لكن لكويت تتشرف بناس مثلك افتخر اني اشتغل معاك بهالحملة ..
وبرد على اللي قال شهالتجمع الخرطي..
لا تحكم على التجمع الحين !!
احكم عليه بأول خطوة يخطوها ..
و اذا كانت نظرتك التشاؤم فعمرك ماراح تنجح بشي بحياتك.
و تجمع القوى الطلابية ماله علاقة بهالتجمع كل واحد له هدف غير.
اذا بتقارن هالتجمع بالقوى الطلابية .. انا اقرانه بتجمع نبيها 5
انا اقدر اللي سواه اخوي احمد لأن هالشي ناس وايد حاولوا فيه و لكن بسبل اخرى و ما نجحوا و السبب (يهال) مع كل احترامي لهم منهم اللي قال انا ابي اسمي يظل و الثاني يقول ما استغني عن تاريخي !!
الكل "مشتهي و مستحي" صدقوني يبيلها صحوة ضمير و اسلوب جاذب لفتح الموضوع أمام القوائم و اتمنى تاخذ كلامي بعين الاعتبار.
اخوي غير معروف
احنا مازلنا بأول خطوة و ليلحين ما اجتمعنا شلون حكمت زنه التجمع خرطي ؟؟
طيب يعني عشان يصير مو خرطي لازم احط لي مبادئ و اساسيات بصفة فردية ؟؟ ولا لازم ناخذ راي القوائم ؟؟ التجمع مو لي انا بروحي عشان احط المبادئ اللي ابيها لازم يتشاركون بالمبادئ فريق عمل كامل و بالاتفاق مع ممثلين للقوائم عشان نصيغ مبادئ و اساسيات ترضي الجميع
وانا قلتها قبل اهي مجرد فكرة ، ابتديت اطبقها بالواقع لا اكثر ولا اقل ماقلت انه تجمع و عندي امين سر و امين صندوق و محدد قضاياي ،، انا بوحد القوى الوطنية هذا حلمي و هذا اساس تجمعي ،، مأيد هالفكره حياك الله تعال و ساعدنا نطبقها ، مو معاجبتك الفكرة يسلم راسك
الرجاء لمن يريد النقد ان يكون نقد بناء ..
و ايضا عدم نقل الحوارات الجانبيه .. هذي مدونة مو منتدى ..
اخ احمد اعمل على الاهداف و الاسس ليكون تجمعك اقوى ..
اذا تكرر الاسلوب السيء بالنقد ساضطر الى الغاء المشاركه
أخ ناصر و أخ احمد
مشكورين على الردود ، و نعتذر للأخ اكاديمي على الازعاج
لكن ، انا اللي اقصده يا جماعة الخير ان شلون تعلنون شغلة للناس و انتوا ما حطيتوا اساسيات ؟
يعني اعطيكم مثال : اقول لكم يالله يا جماعة بنسوي تجمع شباب .. بتقولون لي: اوكي حق شنو ؟ .. اقول لكم : لا للحين ما قررت بس يالله انضموا .. اي شالسالفة ؟؟ اهو مو نادي كرة قدم . هذا تجمع شبابي لازم له اساسيات . عيل معناته الكل انضم لكم و ما يدرون شالسالفة . تبونهم بعدين ينصدمون ؟
اعتذر من اخوي اكاديمي
اخوي غير معروف
اتوقع انه الغرض من الحملة واضح و مذكور
و حتى الفكرة الاساسية مع المبدأ الاساسي موجود
و اهو توحيد القوى الوطنيه بشكل عام و الطلابيه بشكل خاص
و اتوقع الآلية شرحتها و قلت هذا مو حزب ولا تجمع هذي مجرد حملة راح ندعو من خلالها القوى الوطنيه لتغليب المصلحة العامة على المصلحة الخاصه و راح نسعى انه نجمع القوائم و نقوم بدور الوسيط بينهم عشان نطلع بصيغة للائحة توافقية و اهداف مشتركة تجمع جميع القوائم الوطنية تحت مظلة وحدة عشان نكون ايد وحدة مو متفرقين مثل ماهو حاصل الحين ،،،،
يعني دورنا ينحصر في الدعوة و الوساطة بين القوائم و نجاح الحملة او فشلها مرتبط بالقوائم نفسها اذا وافقت عليها او لا ،، عشان جذي قاعدين نجمع اكبر عدد لمؤيدي هالفكره عشان يكون لنا دور في موافقة هالقوائم و نبين لهم انه في وايد شباب من جميع القوائم ودهم هالخطوه اتم
اعتذر عالاطالة و اعتذر من اخوي اكاديمي
و اتوقع شرحت هدف الحملة بشكل تفصيلي
مهما كان الرأي الشخصي يبقى الطلبة هم اصحاب القرار
خلاص احنا تخرجنا
عاجل ..
افا عليك بس ،، الطلبه هم قياذيوا المستقبل و هم الاساس ..
هذا اللي احنا قاعدين نغفل عنه !!
للاسف الائتلافيه تسرح و تمرح و تخرج كوادر اهي و الاتحاد الاسلامي و احنا ربعنا مطشرين بين مستقله و وسط و غيرها ، و غرقانين بالمشاكل اللي بينهم !!!
خطوة موفقة
نتمنى لكم التوفيق
إرسال تعليق