يدا بيد نعيدها لمكانها الطبيعي ...

تحديث

تم القبض على بعض العاملين في لجان جمال العمر و عصام الدبوس بتهمة شراء الاصوات
عسى بس يكون فيه عقاب على مستوى الجريمة !!

لجان بو عبدالمحسن يتصلون على الناس ويقولون لهم اذا محتاجين مساعدة، علاج بالخارج ، محتاجين توظفوون احد ..
بوعبدالمحسن ما يقصر .. و منا الى الحكومة ..

نتمنى نشوف تحرك عالجميع والله يحفظ الكويت

**************************************

في البوست الماضي تكلمت عن موضوع الاغلبية الصامتة و ثقافة الشعب الكويتي ..

طبعا من خلال الردود اللي شفتها شفت ان الاغلبية مازالت مصره على ان احنا الاغلبية الصامتة .. و من وجهة نظري ان فعلا الاغلبية صامتة ولسنا نحن الاغلبية الصامتة .. اي نعم اغلب الشعب صامت و السبب ذكرته من قبل .. و هو تغييب الحقيقة عن الشعب .. و قله الثقافة ..

خلال اليومين اللي طافوا صار معاي موقف تنرفزت منه وايد .. كنت طالع مع اثنين من ربعي .. واحد منهم له توجه سياسي واضح و هو التوجه الوطني .. و الثاني انا اعتبره من الاغلبية الصامتة ..
المهم .. صاحبنا "المغيب" فتح موضوع عن برنامج خالد عبدالجليل .. و اشلون هالبرنامج ناجح و يمكن 90% او اكثر، من الشعب حريص على متابعته ..
فرديت عليه: انا بصراحة ما استسيغ خالد عبدالجليل ولا اتابع برنامجه ..

صاحبي: ليش بالعكس بصراحة برنامجه وايد حلو و مؤثر و بصراحة احنا مستمتعين فيه لانه يطرح قضايا وايد ..

قلتله: انا بالنسبة لي و بنظري انه وايد يبالغ و قاعد يقول شغلات مرات ما اقدر اصدقها .. و للأسف الناس مغيبة و ما تعرف منو خالد عبدالجليل و شنو مواقفة ..

رد بعصبية: انت دايم جذي، يا اخي هذي وجهة نظري انا احب البرنامج و الناس كلها متابعته .. انت شعندك عليه ..

سألته: انت تدري ان خالد عبدالجليل كان محامي دفاع لعلاء حسين رئيس الحكومة المؤقتة ؟

قال: لأ ..

قلتلة: هذي المشكلة، انت ما تدري عن شي و انا ما الومك .. عموما قناة الوطن و جريدتها ما منهم فايدة و اللي يشتغل معاهم هم ما منه فايدة ..

عصب وايد و قال: اشفيك بعد على جريدة الوطن .. تراها احسن جريدة و انا من وعيت عالدنيا و ما اقرى غير جريدة الوطن

المهم دار حوار طويل عريض .. اكتشفت خلاله ان فعلا المشكلة ان الناس مغيبة و مو شرط انهم يكونون منتمين لتيارات الفساد او التخلف
ولكن غياب الوعي هو اللي يخليهم ماشين وراهم بدوون كلام .......


والحل ؟؟

اللي راح اقوله هو تصوري و وجهة نظري ...

في البداية لازم نرتب صفوف التيار الوطني .. وهذا اهم شي .. قبل لا نبتدي اي خطوه لازم نكون مرتبين .. التيار الوطني بحاجة الى لم شمل - وهذا يعني الكثير من التنازلات و التضحيات من اجل المصلحة العامة .
لازم كلنا نتعاون ونحط ايدنا بايد بعض .. وطبعا لازم نكون مثال و قدوة بالتزامنا بالمبادئ اللي نتبناها ..

وعقب هالخطوة الكبيرة و اللي راح تاخذ منا وقت و جهد، "ولكن مردودها يستاهل الوقت و الجهد" ، نبتدي نرسم الخطوط العريضة لخطة عالاقل تكون خمسيه .. لأن ركام هالسنين ما ينزاح بلحظة .. ولازم نكون مؤمنين بهالشي ..عشان لا نتحبط .

وهالخطة شنو معالمها .. ؟؟

اولا .. وثانيا .. وثالثا .. التعليم .. !!! اي التعليم !! هذا اهم شي ..

تيار الاسلام السياسي او التيار المتأسلم دايما يحاول يسيطر على وزارة التعليم وهذا شي صاير في جميع الدول اللي فيها هالتيار ..
و عندنا في الكويت نفس الشي ..

جاءت تزكية المجلس للنواب جمال الكندري وفيصل المسلم وحسن جوهر وسعد الشريع وعلي العمير وعلي الراشد للجنة التعليمية

يعني نسبة 85% من اعضاء اللجنة توجه اسلامي ..

احنا بحاجة الى تكثيف وجود اصحاب التوجه الوطني في لجنة التعليم ..
لازم الطفل من يدش المدرسة يتعلم حب الوطن .. لازم يعرف تاريخ اجدادنا و المعارك اللي خاضوها ضد التخلف مثل معركة الجهرا و بالتفصيل .. لازم ينزرع فيه حب الكويت اولا قبل اي شي ثاني ..
لازم يتعلم احترام القانون لازم يتعلم الدستور .. هذا كله و زيادة ..
وطبعا هالشي ايضا ياخذ وقت طويل مو اقل من 5 سنوات عشان يتطبق و علشان نشوف نتايجه يبيلنا 15 سنة ..

يمكن نظرتي على مدى بعيد ..
لكن شنسوي الحين .. شنو حلولنا لهالفترة ؟؟

التوعية عن طريق الاعلام ..

انا ودي اسميها حملة التبشير بالوطنية :)

اعلاميات المتأسلمين قوية جدا .. من صحف و قنوات تلفزيونية و برامج ..
لازم يكون تواجدنا الاعلامي اقوى ..
لازم نحاكي عقل المواطن البسيط ..
لازم يكون عندنا برامج توعوية ..
لازم نتكلم عن نفسنا اكثر ..
ما نبي هجوم .. نبي نتكلم وعن مبادئنا عن اهدافنا ..
احنا قاعدين محاربين من الاسلاميين ولازم يكون لنا رد شافي و ندافع عن انفسنا و نثبت وجودنا، ودام احنا على حق محد يوقف بويهنا ..

صحيفة + قناة فضائية .. و خلونا نتعلم شوي من "الوطن" ...
انا سمعت خبر وايد حلو .. راح يكون في قناة حق جريدة الجريدة .. وهي راح تكون استمرار لقناة نبيها تحالف لكن عقب الانتخابات ..
اذا الجريدة موجودة و القناة التلفزيونة موجودة ..

تفعيل دور جمعيات النفع العام ..

مثل جمعية الخريجين و الجمعية الثقافية النسائية .. لازم يكون دورهم بارز اكثر و يتجهوون لفئة الشباب اللي محد منتبه لها غير جمعية الاصلاح و احياء التراث ..

الولد يروح يلعب كرة و يرجع البيت يبي يجاهد بأفغانستان ..

شنو بعد؟؟ شنو بعد ؟؟
وايد شغلات ممكن نسويها ولكن .. ايد وحدة ما تصفق .. كلنا معا بعض ايد بايد .. ننسى خلافاتنا ونوحد صفوفنا .. و يبقى الامل موجود ..

لا للصمت

و يا وطن .. لك من يحبك