الى لقاء قريب ...

زوار مدونتي الكرام ..

لا تعلمون مدى سعادتي و انا اشاهد عدد الزوار والذي وصل حتى وقت كتابة هذا البوست الى 780 زائر، و ذلك خلال اسبوعين فقط من بدايتي في عالم التدوين ... وهذا الشئ يجعلني اصر على المتابعة في التدوين .. فشكرا لكم ..

ولكن بسبب ظروف الامتحانات النهائية .. سوف اتوقف عن الكتابة حتى تاريخ 20-6-2008 " وانشالله يكون يوم تخرجي " ..

وسأكتب اليوم للمرة الاخيرة قبل ان اعود اليكم في ذلك التاريخ ..

--------------------------------------------------------------------------------

شعار 2008 الانتخابي ...

ليش الشارع السياسي الكويتي بوهبّه ؟؟

ليش كل ما واحد سياسي (نائب او مرشح) طلعله بكلمة الكل يهب فيها ؟؟

اذكر الانتخابات اللي طافت كانت الهبة الاصلاح .. وقبلها الفساد و قبلها مادري ايش ..

هالسنه الهبه اللي هابين فيها كل المرشحين و في كل مقابلة مع مرشح لازم نلقاه يقول احنا نبي "القوي الامين" ....

ترى شي مادري شلون .. احس ملاقة .. يعني ناس احسهم ما عندهم راي ... مسيّريين :) .. هبتي اليديدة مسيّرين

انا مثلا ما ابي القوي الامين .. ابي " الصادق الصريح " .. بالنسبة لي اهم شي بالانسان ان يكون صادق و صريح ..

اتمنى ان المرشحين يوضحوون شنو يبون بالضبط وخل ينوعووون يعني مو معقول بصراحة .. 300 و شي مرشح كلهم نفس الجملة ..

جمال والاختلاط ...

منو يتابع قناة المهم الكويت ؟؟؟

شفتوا اللقاء النسائي ؟؟

جمال سألوه عن موقفة من قانون منع الاختلاط فقال ان اللي حطوا القانون اهم نفسهم اللي يطالبون بالغاءه وانه بلشونا بهالقانون و هالقانون مو زين !!

و يقول اذا نجح راح يوقف قانون منع الاختلاط !!!! عاش عاش عاش :)

انا اوجه سؤال حق جمال .. مو ذاك اليوم لما طلع في مقابلة مع احمد الفهد " الكاتب مال الوطن " قال انه لما كان بالجامعة كان ائتلافية ؟؟؟ و انه محافظ و مادري شنو ..

غريب و عجيب ... و على قولة بو جسوم في مسرحية سيف العرب : انام كويتي .. اصحى عراقي !!!!!!!!!!!!!!!!

الثقة الحدسية ...

ليش شباب حدس دزوا مسجات تقول: " ليبراليو التحالف سيحشدون اليوم في ندوة الصانع و الشايجي لتخريب الندوة الرجاء حظور اكبر عدد " ركزوا على سيحشدوون .. يموووتوووون على هالحجي .. ;)

اولا .. هل التحالف لي هالدلرجة هيلق بنظر حدس ؟؟ والا كل من يرى الناس بعين طبعة @@

ثانيا .. لي هالدرجة حدس خايفة ان الناس ما تحضر ندوتها .. يعني .. هل فعلا في ناس يعتبرون نفسهم اقوى كتلة ويشكّون ان ممكن محد يحضر ندوتهم ..

الجواب: اي .. وحدس وحدة منهم .. :)

اعزائي ..

تبقى على الانتخابات البرلمانية اسبوعين تقريبا ..

نتمنى تكثيف العمل .. و التعاون من اجل ايصال اكبر قدر ممكن من النواب الوطنيين ..

اتمنى من اخواتي النساء العمل على اقناع الناخبات بالتصويت للمرأة .. فأنتم الاغلبية .. اقنعوهم .. وستصل المرأة

اخواني و اخواتي ..

لنضع حدا لهؤلاء المتأسلمين فقد قيدوا الحريات و قتلوا كل ما هو جميل .. ولنرجع الكويت جميلة كما كانت ..

وبالنهاية .. وكما وعدت وطن النهار .. هذا الاهداء خاص لها .. اغنية جميلة .. تتحدث عن واقع هذا الوطن في ذلك الزمان .. ركزوا بالكلمات ..

يا حلوهم والله ..