علشانهم ...

منو فينا ما شاف اعلان مرشحي حدس ( د. ناصر الصانع - م. عبدالعزيز الشايجي) ..

علشانهم ..
انا صارلي ساعتين ناطر الاعلان ابي اصوره بالموبايل لان مالقيته عاليو تيوب ..و اخيرا سجلتة .. بس حسافة ان مو الصانع .. لان كان وايد متأثر و كان ودي الكل يشوفه وهو شوي و يبجي مسكيييين ..

هل مخرجات التعليم الحالي تلبي الطموح ؟؟ هل تعلم ان اخر مستشفى انبنى قبل 27 سنه ؟؟ علشانهم نبي نهتم بتعليمهم ... علشانهم نبي نهتم بصحتهم ... علشانهم ...
هذي فكرة الاعلان ..
والسؤال اللي يطرح نفسة ...لــ( حدس )..

اين انتم يا حدس ؟؟ صارلكم من 1992 و انتوا لكم اعضاء بالمجلس .. وطبعا تياركم موجود من قبل لكن تسمية الحركة الدستورية يت عقب الغزو..

وينكم ؟؟ .. الصحة مستواها سيئ و التعليم سيئ .. و الحكومة سيئة .. و الداعين للاختلاط سيئين و الناس اللي مو مع حدس كلهم سيئيين .. وانتوا الزينين اللي تفهمون و انتوا احسن ناس بالدنيا ..

سؤال واحد و ابي اجابة !! انتوا شسويتوا ؟؟ تكفوون بس قولولي شنو دوركم ...

ناصر الصانع وايد متأثر بالاعلان .. علشانهم نبي نهتم بصحتهم .. ناصر الصانع انت وينك ؟؟

ناصر الصانع من 92 بالمجلس .. توك تدري ان اخر مستشفى انبنى قبل 27 سنة ؟؟

المجلس اللي طاف كانت حدس تمثل نسبة 14% من النواب .. هذي ككتلة بروحها .. مو كتوجه اسلام سياسي .. لان لهم اصدقاءهم اللي نفس توجههم ..
انتوا من اكبر التكتلات بالمجلس، شنو سويتوا ؟؟

يقولون ان موضوع الاختلاط موضوع تافه و الديره تبي مشاريع تنموية و نبي نطور البلد ..

طيب ميخالف انا بمشي معاكم للاخر .. الاختلاط موضوع جانبي و مو تنموي .. اوكي ؟؟

منع بيع الورد الاحمر في يوم 14 فبراير هذا اهو الموضوع التنموي ؟؟
منع احتفالات راس السنة و مراقبة المطاعم و الحفلات اهو الموضوع التنموي ؟؟

انا اقولكم عن التنمية مالت حدس ...

المصدر ( جريدة الجريدة بتاريخ 14-2-2008 )

كشف مقرر لجنة «دراسة الظواهر السلبية الدخيلة على المجتمع» البرلمانية النائب جمعان الحربش أمس عن وجود توجه لدى النواب إلى إعداد قانون يمنع الاحتفالات المخالفة للشريعة الإسلامية، كعيد الحب وغيره. ولم تكتف اللجنة بذلك في اجتماعها أمس، إذ حددت عدداً من الضوابط الشرعية الواجب تطبيقها أثناء تنظيم البطولة الرياضية لفتيات دول مجلس التعاون لدول الخليج العربية التي تستضيفها الكويت تحت رعاية صاحب السمو أمير البلاد الشيخ صباح الأحمد.

وقال الحربش ان اللجنة وضعت بعض المحاذير للمحافظة على «خصوصية الدورة»، ومنها «عدم السماح بدخول الرجال والتزام المشاركات بزي طويل وليس الزي الرياضي الاعتيادي، إضافة إلى عدم نقل الفعاليات أو تصويرها لوسائل الإعلام والاكتفاء باستديو خارجي للتحليل والإدلاء بالتصريحات والتعليقات فقط»، مبيناً أن هذه الضوابط «ستؤدي إلى تنظيم الأمر ليخرج بصورة شرعية، رغم تحفظنا عن إقامة البطولة أساسا».

وزاد الحربش أن اللجنة ناقشت كذلك الحد من المعاكسات ومضايقات الأسر في المراكز التجارية خلال فترة الاحتفالات المقبلة لمهرجان «هلا فبراير»، إذ طالبت بحضور رجال المباحث للحفلات الغنائية التي تصاحب الفعاليات، مبيناً أن اللجنة تسعى «لتهذيب الواقع القائم».

ولم يفت اللجنة أن تناقش «بدعة» عيد الحب، مبيناً أن وزارة التجارة استجابت نداءات اللجنة بإصدارها تعميما للمفتشين لاتخاذ إجراءات تعاقب كل من يعرض صوراً مخلة بالآداب العامة.

يا جماعة هذي التنمية اللي تدعوا لها حدس ..

انا ابي افهم لي متى حدس تتبع اسلوب التغييب هذا ؟؟

قبل اسبوع متناقش مع واحد حدسي .. اقوله انتوا شنوا انجزتوا .. يقولي وايد شغلات .. اقول له حدد .. يقول وايد وايد .. انزين من هالوايد ابي اقتراح واحد انفردت فيه حدس .. مو مشاركة مع الباجي .. يقول لي هذا تكتيك .. مو شرط يكون مبادرة من حدس بس دام صوتنا معاه او سجلنا اسم مرشح واحد بتقديم الاقتراح نقدر ننسبه حقنا .. وهذي سياسة ...

اي نعم هذي السياسة اللي تتبعونها يا حدس .. سياسة التظليل و التغييب والكذب على العقول ..
ولكن ..
دنى زوالكم .. و انا مستانس لأن وايد ناس اعرفهم كانوا يصوتون لهم .. ماراح يحصلون منهم على ريحة الصوت ..
.. والناس شايفتكم و كاشفتكم ..