السلام عليكم
تحية طيبة لكل القارئيين .. أحب في البداية أشكر ( الدكتور أكاديمي ) على استضافته لي في هذه المدونة الناجحة ..
الصراحة واجهت صعوبة في اختيار أول موضوع لي على المدونة و قررت مبدئيا أن أبدأ بموضوع سياسي بحت .. بس بعدين غيرت رايي لأنه الناس الحين في الصيف خلاص ملت من السياسة ، و القيل و القال و النقد و التحليل السياسي الي يعور الراس .. حتى السياسيين نفسهم في اجازة .. ;)
و لذلك قلت أبدي بموضوع بسيط يتماشى مع العطلة الصيفية و جو ال relax و الاسترخاء الي معظمنا عايشة ...
الكويتيين من زمان يفضلون السفر لأوروبا و أمريكا للجو الجميل و الطبيعة ( شيابنا ) و التسوق ( حريمنا و بناتنا) و المقاهي و التمشي و الفرفشة (شبابنا) ..
علما بأن أوروبا فيها قصور و متاحف و أثار و تاريخ عريق .. و لكن للأسف البعض يفضل التسوق في GORGIO ARMANI بدل زيارة الي متحف اللوفر للفن و يفضل Oxford Street على Leeds Castle و يفضل التمشي في ال Champs Elysees بدل أن يضييع وقته في زيارة المتاحف و القصور التاريخية !!!!
و حتى بعد ما بدينا شوي شوي نهدم السور و الاطار السياحي الضييق مالنا وبدينا نروح أستراليا و غيرها فالأسباب و الدوافع لم تتغير ( جو .. سوق .. فرفشة ) .. و أي مكان ما تتوافر فيه هالثلث أساسيات فعليه أكبر X و بالخط الأحمر العريض بعد !
و لذلك فالقارة المسكينة و المهضوم حقها بحكم تصنيفنا الكويتي هي ( القارة الأفريقية _ باستثناء مصر و تونس و المغرب ) لأنه جوها حار ( انسه شيابنا) و ما فيها أسواق تذكر ( أشكره حريمنا و بناتنا OUT) و طبيعة الفرفشة و التمشي تختلف عن المتعود عليه ( انسه شبابنا ) ..
من أهم اسباب تركيزنا على أماكن معينة دون أخرى هو اننا نفتقد روح المغامرة و الاطلاع على شيء جديد و رحلة سياحية ذات طابع مختلف .. !
ليش ما نفكر نروح سفاري باحدى الدول الافريقية و نزور القرى الأفريقية الي عايشه على عاداتها البسيطة لي يومنا .. ؟
ليش ما نفكر نروح الهند و ناكل الأكل الهندي على أصوله و نشوف التاج محل و القصور العظيمة و الفن و الغناء و الرقص الهندي ؟
ليش ما ما نروح البرازيل .. لغابات الأمازون ؟
ليش ما نروح الدول الأوروبية و لكن يكون الهدف الأكبر زيارة المتاحف و القصور و الغرائب و العجائب ؟
فشعوب الدول المهضوم حقها لا يعرفون ان كانت الكويت دولة بالأساس و لا يعرفون عاداتنا و أطباعنا و ان عرفونا ( بالصدفة ) فأول كلمة تقال : Oil Oil Oil !!
يا جماعة كلنا نحب الجو الحلو و التسوق و الفرفشة .. و لكن نحن بحاجه الى تغيير نظرتنا للسياحة بشكل عام و كسر السور الي تعودناعليه فكريا و معنويا و عمليا .. و استبدال توجهنا السياحي القائم على المتعة الي توجه يحمل لمحة ( على الأقل) ثقافية و اطلاعية ... ففي العالم الكثير الكثير من الغراب و العجائب و الفن و الرقص و العادات و الشعوب و الحضارات و الروائع .. الي ما راح نلقاها بال Champs Elysees !
و هذه بعض الصور تم التقاطها في ( مومباسا - جزيرة في القارة الأفلريقية المهضوم حقها) .. لعلها تبين ما أقصده
(جمال مومباسا المنسي)
قصر استعمله المسيحيون كحصن أثناء حروبهم
مسجد في حي مومباسا
مدخل لمعبد هندي ( يروي قصة كاملة بالصور)!
شفتو حتى ربعنا يعرفون وين يسافرون ;)
هناك 11 تعليقًا:
الله يعطيك العافيه يا بو عابد و حياك بالمدونه ..
كلامك صحيح ١٠٠٪ ربعنا يدورون السوق و القهاوي ..
بس ترى الجو مطلب اساسي الناس كلها تسافر تدور الجو الزين ماعدى اللي يروحون دبي و البحرين .. لان قمة الرطوبه طوول السنه .. :)
عموما احسن شي سويته انك ما كتبت عن السياسه .. خلنا ننوع بالمواضيع شوي :)
الله يحييك تسلم ..
و أنا معاك الجو أساسي .. بس مثل حرنا ما راح تلاقي ، يعني أحنا متعودين على الجايد و كل شي غيره أهون ;)
للأسف عندنا نقص ثقافة مو طبيعي في الكويت، عندنا ٣ مجمعات كبيرة ولا واحد منهم في مكتبة تبيع كتب (اللهم فيرجين في مرينا وبالأساس مو مكتبة). مجمع الامارات في دبي يمكن فيه ٤ مكتبات. المهم انا قصدي ان احنا مو محبين للثقافة ولمه الناس تسافر اخر همها المتاحف والآثار للاسف. نرجع للكويت المناسبات الثقافية الوحيدة اللي لها حضور هي عادة المناسبات الدينية. مايخالف الدين مهم لكن فيه شغلات ثانية بالحياة.
مساء الخير و مشكور عالبوست الحلو
اتفق معاك خاصة واني من اسرة تعز السفر و خاصة للدول ذات الحضارات الفديمة...صاحباتي دايما يعلقوون علي باني عتييجة لما ارجع الكويت و امدح لهم وناستي بزنجبار او الاكل الحلو بالهملايا او القصو الحلوة اللي شفناها بروسيا والا الرقص العدني اللي حضرناه بعرس بصنعاء ...يمكن انا محظوظة اللي حصلت مثل هالفرص ....والحين ودي اروح اخيم بمنغوليا او بوتان ...الوالد وعدني و عادته ما يقصر
ضاري : أن اوافقك الراي ، النقص الثقافي بشكل عام في مجتمعنا ينعكس على أطباعنا و تفكيرنا و أهدافنا و تطلعاتنا .
غير معرف :الصراحة بردتي جبدي .. يعني (حب المغامرة و الاطلاع على الجديد) ما اختفو نهائيا من مجتمعنا .. خليتيني اتفاءل :).. بغيت اسألك ، شلون الزنجبار ؟ حلوة ؟ و اذا تقدرين تعلميني أهم الأماكن السياحية فيها للأني راح أسافر لها هالصيف :)
بو عابد اول شي يعطيك العافية وحياك الله :)
وبيني وبينك مو كلنا نحب السوق انا وحدة طفارتي لما اسافر يضيع يومي بالسوق .. السوق آخر شي ممكن افكر فيه لا سافرت .. بس على سالفة افريقيا عدل كلامك المكان حلو والمعالم حلوه ولا اني ما طبيتها بس انا بسفراتي اراعي جزئية حدها مهمة بالنسبة لي اولا اني ما اشوف عرب بالمكان اللي باروحه لاني لايعه جبدي منهم وين ما اروح بويهي ثانيا الاجانب بحالهم ما عندهم المخوزر وخزني واخزك .. يطالعك وانت تاكل وذاك واقف بعيد يطالعك وانت تتكلم .. وهذا يطالعك لما تحط ايدك بجنطتك يعني احاول بقدر الامكان اروح حق دول اهلها مو خازوزيين
شوقتني وذكرني ان بخاطري اروح اليونان :(
بس عندي صيفي للأسف
اشوفكم على خير :)
تحياتي لك ومستر اكادمي
(بنت بطنها) : كلامك صحيح .. عادة عندنا أحنا العرب (او بعضنا) تلاقينا نروح أماكن فيها تجمعات عربية كثيرة مثل (لندن أو فرنسا) و منها تطلع العادات السيئة (سب ، هواش ، خص .. )
بالنسبة لأفريقيا فهذه القارة صج مهضوم حقها .. أنا شخصيا رحت كينيا الصيف الي طاف و كانت من السفرات المميزةو الغريبة .. لا سوق ولا مخوزز عرب ;)
السؤال انت رحت لها؟؟
انا ما اروح لدول افريقيا لسببين
الجو مرات ما يتواقف مع الاجازه عندنال
و بعدين مو امان
صحيح حتى امريكا و اروبا مو امان بس هناك عاد اكثر
نورت التدوين
على نفسها جنت براقش ..
بوعابد سافر اليوم (زنجبار) و لذلك راح اتليقف و اجاوب :)
اي اهو رايح هالاماكن و ماشالله يحب هالسوالف
المهم فأنا سألته نفس السؤال اللي عن الامان و الجو .. يقول الجو جيد و بالليل بارد ، والاماكن اللي يروحلها امان و مسوّره محد يدشها ..
Hi .. sorry g3ad aktib bil english bs l2ny outside q8
ya sheen il tlaigif 3laik ya doctor academy , bas ma nigdar ngool shay ,, inta il big boss .. lol
3la nafsha chnat braagish : mthil ma gal doctor academy .. ana rayi7 Kenya w Mombasa w kil wa7daa il 9raa7a a7laa mn il thanya
w ana al7een 7alyan bil zingbar w inshalla awareekum il 9owar lama arid ;)
bil nisbaa lil gaw .. gawhaa b shkil 3aam 7loo il 9ib7 hwaa 5feef bared w itha kan feh shams il 9ib7 f ihee 5feefa w ma ta7rig w tra bil lail bard ya3nee nalbis shitwee marat .. f mo 7aar bil 6reega ilee
a'3laab il naas mit5ayileenha
w bil nisbaa 7ag mawthoo3 il amaan .. tra ntham afreegya yi5tlif shway 3an europe ya3nee il fnaadig mo adwaar .. il '3oraf t9eer mthil il shalaihaat il kbeera w il findig msawar kila w feeh security .. w 7atta bil nisba 7ag lama nro7 il villages tra mo3tham il sha3b wayid friendly w 5a9tan al7een bil zingbaar aktharhum moslmeen w kil mn ysalim 3laina ;p
mnawir il blog b ahaala ;)
متاسفة جدا عالتاخير
بالنسبة لزنجبار لازم تاخذ جولة عالابواب القديمة ترى متعة ما تتعوض راح تحس انك بالكويت ايام شرق وجبلة
وفي بيت قديم يديرونة امريكان فيه عشاء فوق السطح مع جلسة طرب يعني السامري مالهم لا يفوتكم ...الديرة بسيطة وحلاوتها ببالبساطة ....الشعب دمه شربات
إرسال تعليق